पूर्वतयारी भाग २:HDOR 100 दिवसांचे आव्हान: कोलकाता चेन्नई सायकल मोहीम

पूर्व किनाऱ्यावरील सायकल सफरीचा आनंद कागदावर मिळत असला तरी प्रत्यक्षात योग जुळून येत नव्हता. २०२३ हे वर्ष पुढे सरकले. माझे दैनंदिन सायकलवणेच होत नव्हते तिथे मोहीम कशी आखणार? पुन्हा एकदा HDOR मदतीला आले. HDOR हा १०० दिवसांचा कार्यक्रम आहे. २०२३ मध्ये मी HDOR मध्ये भाग घेतला नाही. मात्र २०२४ ला HDOR चा कार्यक्रम समजताच मी त्याच्या पाचही टप्प्यांची व्यवस्थित आखणी करायला सुरुवात केली.

HDOR ही खरेतर भाग घेणाऱ्यांमधील एकमेकांशी स्पर्धा नव्हे. किंबहुना एकमेकांकडून स्फूर्ती घेत आपले स्वतःचे सायकलवणे सुधारवण्याचा तो कार्यक्रम आहे. HDOR मध्ये २० दिवसांचे ५ टप्पे असा एकंदर १०० दिवसांचा कार्यक्रम आहे. त्यामध्ये भाग घेतल्यावर सायकलवण्याला निश्चित ध्येय मिळते. मी प्रत्येक टप्प्यामधील उद्दिष्टांचा अभ्यास करून माझे प्रत्येक टप्प्यातील वैयक्तिक ध्येय, उद्दिष्ट ठरवले आणि त्याचा सातत्याने आढावा घेत त्यात सुधारणा करत होतो. प्रत्येक पुढील टप्प्यात आधीच्या टप्प्यापेक्षा किमान १०% ते ४०% सुधारणा करण्याचे उद्दिष्ट ठरवले. 

ह्याचबरोबर भारताच्या पूर्व किनारपट्टीवरील सायकल प्रवासाचा कार्यक्रम आपसुकच ठरवला गेला. HDOR च्याच अंतिम म्हणजे पाचव्या टप्प्यामध्ये पूर्व किनारपट्टीची मोहीम करण्याचे निश्चित केले. ह्यात दोन उद्दिष्ट्ये एकत्रच पूर्ण करता येणार होती. HDOR मध्ये शेवटच्या टप्प्यातील कामगिरी उंचावता येणार होती आणि पूर्व किनाऱ्याची मोहिमही पूर्ण करता येणार होती.

१०० दिवसांचा कार्यक्रम निश्चित करताना त्याच्या आखणीमध्ये सुधारणा करत असताना शेवटच्या टप्प्यात साधारण २००० किमी चे वैयक्तिक आव्हान मी स्वीकारायचे ठरवले. आता मात्र ह्या शेवटच्या टप्प्यातील २० दिवसात मी चेन्नईपासून थेट कोलकाता गाठायचे ठरवले. कारण हे अंतर जेमतेम १८०० किमी च्याच आसपास असणार होते. 

पूर्व किनाऱ्याची मोहीम मी ठरवत असताना रजेचे दिवस, प्रवासाचा वेळ, सायकल वाहण्याचे नियोजन, मोहीम करत असताना सामान वाहण्याची तजवीज, मार्ग, मार्गातील टप्पे ही निश्चित करायचे होतेच. मात्र त्याही आधी बरोबर येणारे सहकारी, संघ बांधणी, त्यांची वैयक्तिक उद्दिष्टे, तयारी हे सुद्धा विचारात घ्यावे लागणार होते. मी मोहिमेचे दिवस नक्की केले आणि पण सहकारी, संघ कुठे होता....!